[Resolución conxunta entre GKB, UJC-m, JCE(m-l) e CJC]
Este 29 de Setembro unha boa parte das organizacións sindicais do Estado Español convocaron os traballadores á Folga Xeral.
A reforma laboral aprobada polo executivo empeora os dereitos da maioría social. Facilita e abarata o despedimento, abre a porta á privatización dos servizos públicos de emprego, ampla os supostos onde aplicar contratos formativos e esténdeos ata os 25 anos, incrementa a temporalidade, etc. Un dos principais ataques é contra a negociación colectiva, que se trata de desregular e limitar. A negociación colectiva foi unha das maiores conquistas da clase obreira no Estado Español, que se arrebatou á oligarquía española no período do franquismo. Todas estas reformas son un ataque especialmente agresivo cara á xuventude e o seu futuro.
As organizacións asinantes creemos que este ataque se suma á política antisocial do Executivo, seguindo os mandatos neoliberais da Unión Europea, que nos colocou no 20 por cento de paro, recortou salarios dos funcionarios e empregados públicos, conxelado as pensións contributivas, recortado o gasto social (dependencia, xubilación parcial), aumentou o IVE, cedeu miles de millóns aos bancos ao capital financeiro, deteriorou os servizos públicos, mercantilizado a educación a través do Plan Bolonia e reprimido calquera forma de expresión da xuventude.
A submisión do goberno español aos ditados do neoliberalismo colocouno contra os traballadores e os mozos. Novos ataques como o empeoramento das condicións de xubilación prepáranse nos centros de poder. A loita é unha necesidade, non hai escusa posible.
Dende a dereita mediática e tamén dende o social-liberalismo atácase con saña ao sindicalismo e a organización dos traballadores. Unha brutal campaña antisindical pretende restar apoio á Folga Xeral con mentiras e enganos dende todos os medios de comunicación nas súas mans.
Dende a nosa aposta por un sindicalismo de clase e combativo, apoiamos esta folga como un primeiro paso para o combate que se aveciña contra a minoría insaciable e antisocial que pretende cargar a crise ás costas dos traballadores, os mozos, as mulleres, os emigrantes e os pequenos propietarios.
Ademais, a reforma laboral e a crise capitalista supoñen uns retos para a xuventude que formulan de cheo a necesidade de empezar a construír pontes de unidade entre a xuventude comunista do Estado Español, lazos que se constrúen co debate teórico e a unidade de acción. Somos unha nova xeración á que nos é allea o sectarismo e a tendencia á fragmentación que caracterizou outras fases da historia do comunismo no Estado Español.
Hoxe, o sistema capitalista vive unha crise brutal, pero se non soubemos aproveitar as súas contradicións é porque aínda non existe a organización nin a conciencia de clase suficientes para derrubalo e construír a Revolución Socialista. A xeración actual de mozos temos a disposición de forxar na loita un referente revolucionario, sen sectarismos pero coa obriga de non repetir as traizóns e os erros que levaron á derrota aos nosos predecesores nos anos 70 e 80.
O mesmo cabe dicir da praxe sindical. Se ben apostamos por esta convocatoria de Folga Xeral, tamén cremos que é necesario apostar por un sindicalismo de clase consecuente, que aposte pola unidade da clase obreira e pola mobilización e non caia en posicións claudicantes nin persiga a mal chamada "paz social". Esta crítica a certas prácticas das cúpulas sindicais non debe facernos esquecer que o inimigo é o capitalismo e que baixo determinados ataques contra as cúpulas (como o asunto dos liberados) se esconde a criminalización da mesma idea de sindicalismo.
En último lugar, queremos denunciar a parcialidade desta democracia burguesa, que queda moi patente coa actual crise. A nosa "democracia" sempre foi presentada hipocritamente como a de todos e todas, pero a aprobación da Reforma Laboral levouse a cabo sen contar coa opinión nin o poder de decisión dos traballadores, vía Referendum vinculante. Isto mostra a verdadeira cara parcial desta democracia: a defensa dos interes dos empresarios fronte aos dereitos dos traballadores.
Por todo iso chamamos a toda a xuventude a mobilizarse a favor da folga dende os seus centros de estudo ou de traballo para facer desta folga un éxito. Tomemos o futuro nas nosas mans. Organicémonos e loitemos.
Esta folga ímola gañar!
Non queremos pagar a crise do capitalismo!
A xuventude á ofensiva! Viva a loita da clase obreira!
